【揹水一戰】行山越野實戰訓練班

0

係揹水一戰前夕,大會安排咗唔同嘅訓練班俾一眾參加者做好準備,今次嚟到行山實戰技術班,大會搵嚟香港越野界知名好手黃浩聰同大家分享行山技巧,自身比賽經驗及訓練日常等等,一齊回顧下當日有咩精彩內容!!

各位參加者一大早就嚟到東涌集合,開始嘅時候大會特別安排咗一個水籃,用嚟教大家點樣用最環保嘅方法去改裝,當中有提及過,以往有不少參加者都會用「豬腸」將背帶加厚,減少因為摩擦皮膚而出現的擦損問題,由於今年大會提倡環保,所以不會鼔勵參加者用非環保嘅方法改裝,所以今年大會亦有些微修改水籃背部,加入軟墊,預防參加者背部擦損問題,如果大家仍然想要增加舒適度,背帶可以紮上舊毛巾,效果其實同用「豬腸」無異,最後一個改裝秘訣,就係要固定水籃入面樽水,黃浩聰建議大家用一條橡根拉緊樽口限制樽裝水上下晃動,一條橡根拉緊樽身就可以避免左右搖動。

教授完改裝水籃之後就開始進入行山訓練課程,大家喺集合地點先收拾好行裝後,一齊慢跑去黃龍坑暖暖身,大家都知道一小段嘅慢跑作為熱身稍為不足,所以係行山訓練之前,再進行咗一次針對行山嘅動態熱身,當中仲有加入跑步理論,希望可以幫助到大家跑得更快,用更好嘅成績完賽,緊接住就係今日嘅戲肉行山技術示範。

行山最基本一定有上樓梯同落樓梯,黃浩聰解釋上落樓梯技術比一般人想象嘅仲要複雜,就佢經驗之談,有不少人十分注重上樓梯時雙手擺位,其實雙手擺位要視個人當時身體條件而定,而落樓梯就要留意踩位及每次跨越梯數目,詳細內容會有其他文章及影片再特別解釋,其後亦有提供落斜技術教學俾大家,令到大家面對落長斜同落斜速度快慢調節時更加有信心完成。

最後大家亦一齊跑返去集合地點,好出色咁完成咗一整朝嘅訓練課程,嚟到尾聲大家都相當熱烈提出各種問題,黃浩聰都一一耐心解答,喺臨別之前仲講咗一番說話勉勵大家,希望到時大家都能夠以最佳狀態落場。

Comments
Loading...