【揹水一戰】跑步訓練班

0

揹水一戰嘅參加者,除咗為體驗缺水居民生活之外,部份人更加視參賽係一個挑戰自己嘅機會,為成績為時間而戰,唔知你屬於邊一種參加者呢?

如果你想要衝成績,參賽嘅時候或多或少需要夾雜跑步,務求令你更快完成,如果你只想要完成全程或者今次挑戰更長距離,跑步會係最重要嘅訓練項目之一,距離愈長有氧體能力需求就愈大,而跑步就係一個好好嘅訓練工具,幫助你快速提升有氧能力,鍛練身體達到完賽嘅要求,所以大會一共舉辦咗三種訓練班,跑步技術訓練班就係其中之一。

今次跑步訓練班選喺斧山道運動場舉行,星級教練搵嚟今年毅行者破記錄選手及長跑好手梁影雪擔任,過去佢亦曾經多次參加揹水一戰,成績同樣相當亮眼,作為一個越野跑兼長跑選手,訓練班不單止跑步,更多嘅係自身經驗之談!

同其他訓練班一樣熱身當然係打頭陣,動作大多數係針對下肢嘅動態熱身,高抬腳,小跑步,踢腳等等,然後就係慢跑兩三圈,當身體完全熱身之後就進入正式跑步訓練課程。

教練因應運動員參加賽程,所定嘅訓練內容會有所不同,不過基本上訓練主要圍繞住長課同間歇跑,今日會先教參加者間歇跑注意事項及訓練休息比配搭方法。

教練更會就學員所報嘅距離個別指導,特別是42公里就需要完成15次400米衝圈,而30公里則為13次,15公里相對較為輕鬆設定為10次,每次完成一個圈都有兩分鐘休息時間,中間要注意每圈配速唔好下降超過十秒,持續訓練後應該根據自己能力不斷提高難度。

今年揹水一戰一共有三個距離可以選擇,15公里、30公里、42公里,教練有提及過想要順利完賽,在訓練中至少要長課跑達到過接近嘅公里,想要有更好成績嘅朋友就需要訓練到有足夠信心完成路程,當中42公里要落最大苦功,因為最後會有一個上斜樓梯路段,前段適宜保留體力,最後路段切忌人衝你衝,維持自己訓練時嘅速度再視情況臨場配速,成績一定會比跟人亂衝好。

Comments
Loading...