【渣馬統計學】渣馬2018場邊非正式統計,邊對跑鞋牌子最多人用??!!

0

今次渣馬Runrun記者除咗喺終點位同大家直播之外,我哋仲有喺場邊做咗啲統計,研究下到底挑戰組各位精英跑手們會選揀咩鞋落場呢?當然統計結果未必係最準確嘅,但大致上都可以幫大家一窺長跑界頂尖跑手之選。

1.NIKE

Nike跑鞋今年獲得最多嘅選手選擇,雖然可能同選手本身贊助有關,而出現大比例用Nike跑鞋嘅情況,睇返全馬項目中,用NIKE嘅男子選手清一色都會用Nike Zoom Vaporfly 4%,只有一小部分使用NIKE FREE RN,但係女子選手就比較多用NIKE FREE RN落場,Nike Zoom Vaporfly 4%使用比例遠低於男性,記者覺得可能同Nike Zoom Vaporfly 4%中底太厚,而女選手發力上無男選手咁大,用唔到中底反彈力量之餘,更加有可能出現能量散失等問題,得不償失,所以最後偏向揀NIKE FREE RN落場.

 

2.ADIDAS

今次落場而選用ADIDAS跑嘅手部份都會用UltraBoost,依一對鞋無男女之分,可以話係一款比較全面嘅跑鞋,可能因為中底無特別加厚,跑鞋參數亦比較平易近人,加上Boost中底已經推出咗好一段時間,技術成熟之餘,俾到跑手信心,雖然選手比例無NIKE咁高,但係成績就相當亮眼,男子組第一名Mung’Ara就係著Adidas Adizero Adios Boost 3 ,可謂搶盡風頭.

 

3.ASICS

ASICS就比較多本地選手使用,特別係半馬同十公里嘅選手,有唔少人都會用ASICS落場,雖然大家喜好都有唔同,所選擇嘅鞋款比較分散,記者仲觀察到一點就係,如果選揀薄底鞋上場跑嘅手好大機會都會用ASICS,而主要集中係半馬同十公里嘅選手原因,記者認為同里程數有關,里程愈短,跑鞋避震及緩衝能力無全馬咁重要,造成依個情況出現。

 

4.MIZUNO

記者睇到有一小撮跑手用MIZUNO跑鞋落場,應該同選揀原因MIZUNO一樣,各大品牌依一兩年不斷推出厚底鞋,MIZUNO同則比較專注於薄底上,例如薄底避震,鞋底紋路膠粒上,如果比較鍾情於傳統跑鞋,普遍都會揀MIZUNO同ASICS。

Comments
Loading...