【蝦叔周報】人在跑圈,謙虛很難

0

肥瘦尚有客觀標準,何謂謙虛,則像空氣一樣摸不著。最令人懊惱的是,「謙虛」有個只差一字的孖生細佬,叫做「虛偽」。兩者只差一線,卻又何其相似。

「滿招損,謙受益。」講就係咁講,但一個「謙」字,火候過頭變成了「偽」時,其實比「真自滿」更加令人側目。

當然,我好清楚如果你係李嘉誠、馬雲的話,絕對唔會蠢到公開話「我好窮」。正如Eliud Kipchoge、Sir Mo、保特果啲,亦唔會無啦啦走去跑步討論區度呻「我好慢」,無可能咁豬。

超人係極少數,絕大多數人之尷尬,就係踩正中間位——比上不足比下有餘,真心覺得自己「好一般」,但又忍唔住要出下post「刷存在感」時,就最容易出事。

拿,請唔好同我講「其實你可以唔出聲」。等於樂天減價兼免運費苦惱緊已經成屋都係鞋時,你走黎同我講「其實你可以唔買」一樣。世事咁容易畀你一句解決,咁呢個世界就唔會有咁多問題。

咁你有咩方法?Sorry,我都唔知。

唔好「車」我住,我從來無話要提供咩解決辦法。來吧,其實何不逆向思維?在跑界混,反正謙虛這麼難,一不做二不休,不如索性將自己弄得有咁虛偽得咁虛偽。

不過,虛偽也是要付出的,首先你要練到有返咁上下。咩叫「有返咁上下」,心照;因為如果你真係好慢,人地只係覺得你坦白,無人會覺得你扮野;

功力練成之後,恭喜您了,以下方案,經過多年臨床實證,保證令你在跑友心目中留下深刻印象,萬試萬靈!請得閒就自選返三兩個在長跑討論區重覆演繹:

.一入谷就貼以平均70多秒完成20個400(或同等程度)的練習紀錄,然後加返句:「新手求指點。」

.經常使用「#懶」、「#慢」、「#hea」之類hashtag(大前提係你要練/扮練得好金)

.不時發佈表情如喪考妣的自拍照,哀嘆「點解我咁慢」。

.蓄勢待發準備PB的那個賽前貼一大堆藥 / 睇鐵打 / 睇針灸的照片,當然以黑白效果處理;

.再強調今次當長課 / fun run / 玩吓。

.賽後在快你少少少少的跑友樓下留言:偶像 / 神級 / 羨慕 / 你就勁啦……等同級形容詞。

.有人回應「你都勁」時,強調自己好彩 / 食錯野 / 條路短左……總之就唔係你有練。

.約比自己明顯慢的跑友跑步,原因是「大家差唔多披醒」。

.憶述昨晚跑班情況:「尋晚落C組鬆腳,嘩C組啲人原來咁勁,我打算申請留喺C組……」

.些牙「當年今日」,哀嘆自己10K由60分進到40分「無乜進步」。

.貼渣馬達標選手連結,tag某幾個實力相近的叫佢地報名,hashtag「#這些機會」。

知所誰退,至關重要,唔係下下都要出聲的。魯迅都教過:「最高的輕蔑是無言,連眼珠子都不轉過去。」

由於你在意的只有三件事——速度、速度,同埋速度——所以任何與呢三件事無關的人、事、文,必須嚴加打壓,切勿些牙,反應都唔好畀:

.任何擺明fun run,無人講速度的比賽。近如聽聞有鮑魚食的街馬,遠如台灣田中、日本東北風土、法國波爾多紅酒馬等。

.那些故意跑得慢,故意站站停慢慢食的不長進跑手的賽後包膠。

.當然還有這篇爛鬼蝦叔周報。

掛住食,離晒大嫂。(攝於2017日本天童半馬,賽事以當地名物la france啤梨為號召)

 

Comments
Loading...