【蝦叔 X 蝦嫂】一起跑,羨慕吧?

0

【蝦叔】

羨慕我可以和另一半跑?實情是一如很多世事:你睇我好,我睇你好。

我知道,在無數跑友殫精竭慮申請「行街紙」的時候,我這樣的心聲很容易給視為風涼說話。沒錯,我確實不須「行街紙」(還不時給人揶揄我跑得太少),但也不代表一起跑就如大家想像中的羅曼蒂克,例如以下的情況:

  1. 心情不好的時候:練跑這回事,心情好要跑,心情不好也要跑。碰上對方心情不好的時候,本來已經易生口角,一起跑步更有可能將事情弄得更糟。例如我跑步一向「沉默寡言」,有人會突然抱怨我為何「粒聲唔出」;例如我跑步一向「步大力雄」,有人會突然投訴「你啲腳步聲好煩」,總之在這天甚麼都討你厭。
  2. 跑馬拉松的時候:男人要帶妻子或女友跑馬,少不免要帶備額外的能量膠,又或須充當臨場攝影師。此時此刻,想起昔日獨個比賽肆意奔馳的瀟灑(雖然其實也只是六分速),你巴不得下一個水站有香煙供應,好讓你滄桑地吸上兩口。
  3. 認真練習的時候:遇著你和另一半速度頗有距離,而你又想用自己速度練習時,勉強和另一半一起跑其實變相等於毁了一課。對方一句「你今日陪我跑架可」,就使你本來想練的tempo硬生生變成了recovery。

不過,我又想起舊同事曾經這樣說:「我也不喜歡到我外母家呀,還不是每星期去,去足二十年!」一起跑雖然並不如想像中的羅曼蒂克,但愛情這回事,從來就不是每分每秒都羅曼蒂克的吧?間中一起跑,終究是好的,因為它輔導我如何和另外一個人一起過。

————————————————————————————————–

【蝦嫂】

大家成日羨慕我有伴一起跑。可以同大家講,開頭呢,確係幾好嘅。

記得初初開始時,最大困難係記路。自己跑,好多時要跑下停下,唔記得D路線,有時仲要攞埋電話睇「孤高map」,好似睇風水攞住個羅庚咁轉黎轉去。所以有伴好好多,人肉GPS,起碼唔駛用腦。行錯路又可以賴佢,幾好呀!(港女出沒注意)

除左認路,仲可以充當「兩保」——保姆同保鑣,會安全D。仲可以邊跑邊傾下計,幫忙補給,時間好似過得快D。

(第一次青公長課)

隨著日子過去,自己跑原來都有佢嘅好處:

  1. 我鐘意幾時去都可以,朝活、夜跑、飯前攝下時間又跑(唔駛再勉強佢去)
  2. 可以專心留意自己腳步同pacing,了解身體狀況。有時候如果邊跑邊傾計,會分心,又忽略咗聆聽自己身體 (唔駛聽到佢D腳步聲)
  3. 始終我同佢唔同pacing,要佢就我浪費練習時間;要我就佢我又跟不上 (唔駛追佢搞到扯蝦)
  4. 我唔鍾意俾人感覺冇「食力」,成日要有人護住先跑到,其實我也可以自己嚟  yeah!!!
  5. 再加上,久而久之我都認得路啦,哈

總括而言,我好慶幸同佢有共同興趣、共同語言。平日活動、去旅行都離不開跑步。發展到而家,我覺得偶然唔同佢跑,自己跑更好。跑步為我製造一個私人空間,俾我靜下、思考下,令我可以欣賞風景,與自己對話同交流。

又想起呢首歌……「歲月太長 會令你忘記了伴侶差一句讚賞」

唔係用完即丟,而係希望大家有更多空間同練習機會,偶爾我地都會一起跑去食飯;就算冇一齊長課也可以約定食個早餐。

Comments
Loading...