【跑步生活】食幾多,跑幾多?

0

大熱天時,大家都仲咁辛苦堅持要去跑步,相信好大原因都係因為想保持健康體態。但宜家夏日熱辣辣,食埋食埋咁多零食雪糕,出街又忍唔住飲可樂消暑,到底要做番幾多運動先補到數呢?

英國一個關注健康嘅組織The Royal Society for Public Health (RSPH)就做咗一個研究,睇吓唔同嘅零食要跑幾多分鐘先可以消耗相應嘅卡路里。睇完之後大家就知道自己應該要跑幾耐去消耗番食咗落肚萬惡嘅脂肪。

等我哋由淺入深,先由跑得最輕鬆嘅零食開始。原來一罐汽水所含嘅卡路里大概係138kcal,跑番13分鐘就可以補番數。

薯片都算係一個唔錯嘅選擇,一包薯片大概由八成空氣同兩成高溫烤焗而成嘅薄切馬玲薯組成,所以只有171kcal卡路里,跑夠16分鐘,啲脂肪自然好似空氣咁自己飄走!

之後就係朱古力!一排朱古力所含嘅卡路里大概係229kcal,跑22分鐘就可以同佢哋講byebye,都算抵玩!各位好甜人士可以放心食朱古力啦,不過記得要跑番相應時數同適可而止。

返工係係office坐足全日,飲一杯中杯裝嘅朱古力咖啡提提神真係基本啦。但係提神嘅代價就係,要跑番28分鐘去消耗290kcal卡路里。

難度開始提升!平時食午餐諗住清清哋食個三文治可以減到肥?咁諗就真係太天真啦!一盒平時成日會係便利店見到嘅兩件裝嘅雞排煙肉三文治就含有445kcal卡路里!足足要跑42分鐘先可以減得到!

係時候打大佬啦!平時開Party都會叫吓Pizza嚟食。但原來食兩片Pizza(大概四分一個Pizza),就已經要跑43分鐘,大概九個字號時間去減走大約450kcal嘅卡路里。

睇完依個研究,大家都應該大概計到平時自己練跑嘅時間啦!咁就快啲照計劃去進行你哋嘅跑步大計啦!

Comments
Loading...