【跑步急症室】間歇跑惡夢-側腹痛

0

 

 進行高強度訓練 (HIT)或者高強度間歇訓練(HIIT)嘅時候,有無試過肋骨下面突然非常疼痛,就算仲有力跑都痛楚難忍一定要停底休息,但喺停底休息一陣身體好快就會回復正常,再跑就會再痛過,到底發生咗咩事,會令到身體出現咁劇烈嘅痛楚呢?

其實科學界對運動所引起嘅側腹痛依然眾說紛紜,普遍認為橫膈膜抽筋、橫膈膜缺血、呼吸與動作不協調、內臟韌帶受到拉扯,以上四大原因會引致運動嘅時候側腹出現劇烈痛楚,而跑步所引起嘅側腹痛事前並唔會有任何徵兆,當呼吸過於急速或身體需要大幅度動作時,都相當容易引發側腹痛問題。

當出現側腹痛嘅時候,最後一條肋骨下方會出現劇烈痛楚,呼吸變得短淺,大打吸氣會引發起更強烈刺痛感,如果身體向前傾嘅話,疼痛感覺會稍微減輕,完全休息大概五至十分鐘,呼吸會慢慢變返暢順,疼痛感覺亦會慢慢消散,最後身體會回復正常。

跑步側腹痛所引起嘅疼痛程度因人而已,但喺通常都會令到人無辨法繼續運動落去,聽落好似好得人驚,而且科學界對依個問題仍然未有共識,咁喺唔喺無得預防側腹痛嘅出現?

其實要預防側腹痛出現唔難,首先,喺進行劇烈運動前,應該先進行10-15分鐘熱身運動,藉此加快肌肉血流量,提升體溫,幫助身體適應之後嘅運動強度;然後,運動過程中控制呼吸速度同深度,避免快速大吸大呼嘅呼吸方式,成個運動過程中最好保持平穩有節奏嘅呼吸方法;最後,食完飯之後一個鍾先好開始運動,避免食物喺胃裹面搖晃,誘發出側腹痛。

整體嚟講,因為運動引起嘅側腹痛喺有機會預防嘅,而且側腹痛出現機率會隨著個人體能條件上升而降低,如果側腹痛出現最好先停底休息下,疼痛情況仍然持續的話最好尋求醫療協助。

Comments
Loading...