【跑步生活】五個跑鞋清洗小貼士

0

我…我真係好唔捨得佢啊!作為一個勤力嘅跑手,無論任何天氣,我都堅持會去跑步。我感覺到我嘅身體一日比一日強壯!但係…我對跑鞋亦都一日比一日殘舊,仲有陣臭到咸魚咁嘅味!但我真係唔想掉咗你!我點可以掉低你,掉低我哋一起跑過的日子呢?跑鞋變得殘舊同有啲臭其實好小事啫!洗乾淨又新嘅一樣啦!但係洗跑鞋嘅時候,有幾點要留意啦!

1. 跑鞋唔好洗咁密

用家着住跑鞋嚟練跑嘅同時,跑鞋就會隨住腳本身嘅熱氣同濕氣變得稍微感覺寬鬆咗啲。每次我哋洗完對跑鞋,都會覺得對鞋好似又緊咗咁,咁係因為洗完之後對鞋要係烈日下曬乾。咁樣可能會令到對鞋着上腳時候嘅感覺有變。所以都係唔好洗咁多鞋啦!

2. 鞋墊都要洗乾淨

跑鞋嘅臭味,其實多數都係鞋墊上嘅細菌!所以記得要洗鞋之前,將鞋墊拎出嚟分開洗乾淨!

3. 跑鞋切忌浸水

洗鞋嘅時候千奇唔好開一盆水嚟浸住對鞋!因為鞋嘅設計多數都唔適合接觸水,所以用花灑沖下就已經好足夠。

4. 洗衣機洗跑鞋?

將跑鞋放入洗衣機洗其實會令到跑鞋嘅壽命變短。但如果真係太懶唔想用手洗,都可以用最慢嘅轉速與最短嘅洗滌時間,將跑鞋連埋幾條毛巾一齊放入洗衣機到洗。毛巾可以減慢洗衣機轉動時跑鞋受到嘅撞擊。

5. 跑鞋唔曬得

洗完白白,,跑鞋乾淨哂!但係依個洗鞋嘅戰鬥尚未完結!我哋系風乾對鞋時,可以放佢在電風扇前吹。但千奇唔好放係陽光下曝曬。我哋仲可以將撕爛咗嘅報紙塞入跑鞋入面,因為報紙對水漬嘅吸附性好高,可以快速抽乾鞋入面嘅水分,減少細菌滋生。

Comments
Loading...