【跑步生活】令人不願跑步的壞習慣

0

成日都話想健康減肥乜乜乜,諗好哂今日點都要去跑番半個鐘,但最後都總係會有啲阻滯,搞到去唔成又留咗係屋企。到底我係咪被邪靈附體,定係俾人落咗降頭唔俾我做運動?嘩!咁嘅藉口都講得出!講到尾其實咪又係俾自己平時嘅壊習慣搞到的唔起心肝去付諸實行啫。咁到底有啲咩壞習慣,原來平時我地無留意到嘅,但卻影響到我哋嘅健康人生呢?

1. 唔食早餐冇動力跑步

講真啊,每日晨朝咁早起身趕頭趕命去返工,邊會有時間食早餐喎。同埋好多時侯都唔夠瞓,根本就冇胃口食早餐。所以好多人都會直接skip咗早餐,直接空肚返工再直落空肚食午餐。
美國一份研究(American Journal of Clinical Nutrition)就指出原來食早餐係可以帶俾我哋更大嘅動力去跑步架!研究發現食咗早餐嘅人比起冇食嘅更加願意做運動。而且,早餐之人係朝早嘅時侯已經可以燃燒咗大概200個卡路里!一個豐富嘅早餐可令你全日都精力充沛,大家可以選擇係體內燃燒得比較慢嘅蛋白質同脂肪,例如有煙肉、雞蛋。而牛油果、芝士、乳胳就可以俾到整個早上充足嘅能量,咁個人就冇咁快見肚餓,午餐自然可以食少啲啦!

2. 一日坐到黑

返工坐足九個鐘你估我想架咩,但係原來個人坐得多就愈唔願郁,唔願做運動。2015年英國做過一個研究(British Journal of Sports Medicine)發現一日坐多過8小時嘅澳洲女性係比較唔願意做運動,仲會增加佢地嘅死亡機會。
雖然返工要一日丁黑坐係Office係在所難免,但都記得俾自己take個break,得閒企起身郁動下,拉拉筋伸展下筋骨,離開下個位。

3. 執屋=做運動?

執屋抹屋咁辛苦,都算係一種體力勞動嚟架。每次掃地拖地之後都會成身汗,感覺好似做咗帶氧運動咁。但原來事實並唔係咁架!
美國嘅BMC Public Health就做咗個實驗,邀請參加者去用打掃嚟代替做運動。結果發現,打掃原來唔算係做緊運動架!更加有實驗參與者體重上升,代表住打掃根本唔係帶氧運動啊呀。雖然多啲執屋係好事,但千奇唔好執完屋就當做咗運動啊!


始終都係落街跑步實際啲!

 

Comments
Loading...