【跑步生活】赤腳跑步利多於弊?

0

大家覺得邊樣裝備對於跑步係最不能缺少?跑步喎,緊係對腳最重要,咁跑鞋緊係最唔少得啦,要保護雙腳架嘛!原來唔係架!原來宜家興赤足跑!你仲諗緊買邊對跑鞋好?慳返啲錢試下赤足跑啦!

其實係無跑鞋之前,大家都係赤腳跑架啦!古希臘係馬拉松戰役擊敗波斯軍隊,菲迪皮德斯赤腳跑返雅典報捷。再近返少少,係1960年羅馬奧運馬拉松嘅埃塞俄比亞選手阿比比都係赤腳赴戰,最後贏得奧運男子馬拉松冠軍,成為第一個登上國際舞台嘅赤腳跑者。係肯亞依個盛產跑步能手嘅跑步皇國,跑手所接受跑訓練都係赤腳跑!可想而知,赤腳跑係真係有好處架!

咁到底赤腳跑同着鞋跑有咩分別?赤腳跑步可以令腳掌直接接觸地面,提升人類雙腳本身嘅「自然跑步功能」。有研究顯示,赤腳跑係可以增加腳部效能嘅4%,但係同時亦都提高咗腳板底受傷嘅風險。有赤腳跑嘅跑手更加覺得,着跑鞋跑步會弱化咗腳部肌肉同韌帶,而且跑鞋會影響足弓整體嘅弧度,甚至形成扁平足。不過,唔支持赤足跑嘅人就會覺得跑鞋其實係可以矯正雙腳本身嘅問題,仲可以幫助降低外在環境所引起嘅受傷機會。

赤腳跑步嘅好壞
赤腳跑步,腳部抓地能力會比較強,腳前掌會先落地,令髖部、膝部、雙腳較多屈曲,減少震盪,舒緩膝部壓力,對膝關節好啲,可以鍛煉下肢肌肉。赤腳跑原來可以增強腳跟、韌帶同腳部肌肉嘅功能,培養更加自然嘅跑步姿勢。佢能夠幫助伸展同增強腿部肌肉、腳跟嘅機能,可以減低阿基里斯腱炎同小腿肚拉傷嘅傷患。好多專業跑者都借用前腳掌或者腳嘅中部先著地等步伐可以更加順暢同輕盈。赤足跑可以令足部與腿部的肌肉更發達,令身體有平衡感,產生更好嘅本能感。跑鞋過份保護腳踭,弱化腳部肌腱,反而產生的撞擊力由膝頭傳上盆骨及腰,日積月累會不自覺受傷。雖然赤腳跑係有唔少好處,但赤腳個時腳板底好容易俾地下啲石頭、碎石、釘、玻璃碎割傷。一開始赤腳跑,腳板底好易起水泡或者整損,引起疼痛、甚至感染。不過隨住練習時間增加,腳板底皮膚自然會因為日積月累嘅磨擦而增厚增硬。


赤腳跑練習
啱啱開始赤腳跑嘅時候,腳部肌肉係會唔習慣而感到不適同容易受傷。所以若然想嘗試赤腳跑,記得要循序漸進。首先試下着鞋底較薄嘅跑鞋,再慢慢轉用好似白飯魚之類鞋身比較柔軟嘅布鞋,習慣咗之後開始正式赤腳跑就自然更得心應手啦!

Comments
Loading...