【跑步訓練】如果我只喺想跑跑步機!

到底只喺跑機到底有咩好/壞處?

0

上一編就講過跑跑步機同跑街有咩唔同,確實都真係有人會特別鍾情於跑跑步機,貪佢有冷氣一路跑一路煲劇都得,其實優點唔喺得咁少,同樣缺點都有唔少。

好處:

  1. 唔會受環境,時間,地點所影響,只要有位放部機就得。
  2. 掌握環境因素,夏日熱辣辣開行冷氣跑,冬天開暖爐唔會跑到變雪條,十號風球跑唔會比人講說話。
  3. 體能要求比較低,跑街跑得慢怕阻到人,通常都會逼自己跑快啲,加上路線控制唔點都有上有落,變到次次跑都要去到盡,跑步機一鍵操控,快慢盡在掌握之中。
  4. 跑機真喺無咁傷,因為跑步機會喺你跑嘅每一步吸收接觸時嘅衝力,對關節負荷比較少,同時唔會遇到凹凹凸凸,一唔小心就會受傷,只要跟足安全指引,跑步機真好安全。
  5. 條件相對單一可以準確實行訓練計劃,想練配速定長斜路無難度,唔洗預先做功課查路線,最慘跑跑下要等紅綠燈,造成訓練計劃通常有大誤差。

壞處:

  1. 錢係最大問題,買一部都唔平,入場費至少幾千蚊,後續仲有保養維修等等,樣樣都喺錢。
  2. 香港地吋金呎土,有錢買都可能無位擺,一般建議跑步機需要2m²嘅空間。
  3. 跑姿會比部機改變,跑步機只有上同落地同少量推蹬相對單純嘅下肢運動,相反跑街就要依賴完整跑步動作週期,分分鐘跑機跑得多跑姿變咗都唔知。
  4. 跑機一定唔及跑街有用,如果要參加馬拉從只係跑機訓練效果一定唔會咁好,運動訓練有專項性,同術業有專攻一樣道理,單單運動模式就好唔同。
  5. 要小心跌入單一訓練化陷阱,全部跑步機都有預設訓練模式,好處唔需要諗點練,不過長久落去身體會適應咗,慢慢會遇到樽頸位,效果大打折扣。

 

跑步機其實就好似雙面刃,只要好好拿捏得好,跑步機都可以好有用。

參考資料:

1.NSCA- Essentials of Strength Training and Conditioning, 4th Edition

2.NSCA- Essentials of Personal Training, Second Edition

3.Aerobic requirements of overground versus treadmill running. Bassett DR Jr, Giese MD, Nagle FJ, Ward A, Raab DM, Balke B.(Med Sci Sports Exerc. 1985 Aug;17(4):477-81.0

Comments
Loading...