【跑步迷思】跑步易患盲腸炎?

0

由細到大,阿媽都話食飽飯唔好跑嚟跑去,好易有盲腸炎。有時食飽飯追巴士,個肚又真係會有啲痛,都真係幾驚會係盲腸炎。其實平時所講嘅盲腸炎,在醫學上叫闌尾炎,但到底飯後跑步或者運動會唔會引起闌尾炎?

其實到宜家都無研究證實飯後跑步會令人有盲腸炎。當我哋進食時,食物會首先儲存係胃入面,然後再逐漸進入小腸,最後先會進入大腸(結腸)。小腸全長大約有4至5米長,盲腸以及盲腸上的蚯蚓狀突起嘅位置就係闌尾腸,佢係小腸的末端,同時亦都係大腸嘅開端。因此,喺理論上嚟講,就算食飽飯後即刻做運動,啲食物都無可能可以咁快通過咁長嘅距離,直入盲腸甚至闌尾而引起闌尾發炎。

咁到底點解我哋飯後運動或跑步個肚會唔舒服?原來係因為食飽飯之後,會有較多嘅血液通往腸胃消化,就好似做運動時血液會流向四肢,令肌肉膨脹。而我哋後運動會有肚痛嘅感覺,係因為腸胃血液供應不足。

雖說食飽做運動係唔會有盲腸炎,但始終飯後運動同跑步都會對身體唔好。因為食飽之後消化器官需要大量血液去消化食物。如果係依個時候做運動,骨骼肌就會搶走好多血液,結果造成消化道缺血,除咗會減弱胃腸嘅蠕動,消化液分泌都會顯著減少,引起消化不良。

所以食飽飯記得要等個半至兩個鐘先好跑步啊!跑步之前記得要熱身減低受傷風險。跑步前小先進行5分鐘帶氧熱身,如緩步跑,達到輕微出汗,增加肌肉嘅血液流動。再進行靜態伸展,輕微放鬆肌肉。最後做爆發力動作,加強肌肉協調,例如抬腿跑30下。跑完都要做番緩和運動例如慢行、手腳及軀幹伸展,去cool down個身體。

Comments
Loading...