【運動科學怪人】晨操前食早餐真係有用?

0

一覺瞓醒叉足電,喺晨操前食返個早晨全餐乃人生一大樂事,食完之後感覺人都會跑得快啲,訓練效果大增,當有一日趕唔切食早餐,但係訓練仍然要堅持,通常依個狀態之下訓練,個人硬係會周身唔聚財,而且時間的確係會慢咗,其實食早餐係唔係真係對晨操咁重要?

訓練或者比賽一至三小時之前食碳水化合物,已經有好多文獻證明可以提高運動表現,但係依編文獻作者就有一個疑問,佢見到晨操喺運動界好普遍,但係訓練一至三小時前要食完早餐,再訓練基本上無咩可能,到底晨操前唔食早餐會唔會影響到訓練效果?

文獻作者搵黎13位單車選手參與實驗,參加者需要完成會三組測試,早餐組(Carbohydrate)、安慰劑組(Placebo)、唔食野組(Water),實驗內容都會進行同樣嘅單車計量測試,為咗模擬晨練嘅情況,特別安排參加者早上7點至9點進行實驗,參加者會先完成10分鐘單車運動(60%Vo2max),中間有五分鐘時間休息,再開始單車計量測試(376 ± 36 kJ),當達到一定輸出量就完成測試。

喺比對三組數據後竟然得出驚人發現,根據研究結果顯示,早餐組同安慰劑組喺單車計量測試表現都明顯比唔食野組好,而且最特別嘅係,早餐組同安慰劑組運動表現無明顯分別,只係生理指數上有些微差別,換句話說,早餐對於晨操其實可有可無,心理效果可能比真實效果更大,結果相當耐人尋味。

雖然結果係心理影響運動表現多過生理上影響,不過作者都認為今次實驗既測試時長同運動量並唔係相當高,依個結果可能只係適合短時間低運動量晨操,未必可以真實反應出朝早進行長距離高訓練量嘅晨操訓練計劃,所以食完早餐再操係唔係有助訓練,仍然需要科學界更多嘅研究。

參考文獻:

Perception of Breakfast Ingestion Enhances High Intensity Cycling Performance( Stephen A. Mears ,Kathryn Dickinson , Kurt Bergin-Taylor , Reagan Dee , Jack Kay , Lewis J. James)

NSCA-Essentials of Strength Training and Conditioning 4th Edition.

NSCA-Essentials of Personal Training, 2nd Edition

Comments
Loading...