【運動科學怪人】肯亞人跑得快,對腳有古怪?

0

有冇諗過點解肯亞人可以稱霸馬拉松界咁多年?就算世界運動列強用盡最厲害嘅運動科學同科技,咁多年都無辦法動搖肯亞人霸主地位,好多人都會覺得同人種同基因令到佢哋有超人般嘅長跑能力,不過科學界比我哋諗得更深入,有一對科學團隊就對青春期嘅肯亞人腳部結構有相當大興趣,科學家認為青春期嘅肯亞人喺生活環境上,令佢哋獲得優越長跑能力。

 

塔爾圖大學遠道去到肯亞,同位於肯亞嘅莫伊大學共同展開咗今次研究,研究目的喺搵出肯亞青春期青少年,習慣赤腳生活同著鞋生活對於腳型會唔會有分別,因而增加長跑運動嘅優勢。

佢哋一共搵嚟103個15歲左右肯亞小朋友協助進行實驗,其中有99個合乎研究資格,所有小朋友會因應有無著鞋嘅習慣分成兩組,再進行研究。

研究一共會分為兩部分,當中收集嘅數據有所不同;第一個研究會收集較為詳細嘅資料,身高、體重、臂長、小腿圍、腳長、足底肌力、腳踝關節活動度、足弓結構,日常活動度問卷調查,下背傷患;第二個研究收集數據相對地比較專門性,身高、體重、跟骨密度、亞基里斯腱力臂、日常活動度(加速計)、下背傷患。

 

結果發現原來習慣赤腳生活嘅肯亞小朋友,喺足部同腳部結構上會有好微妙嘅差異。科學家首先發現赤腳生活嘅小朋友腳掌長度會大3%,足弓高度比赤腳習慣嘅高0.1cm左右,而亞基里斯腱力臂比習慣著鞋會短0.3-0.4cm,同時腳底肌力明顯較大,另外研究團體亦都有統計肯亞小朋友傷患數目,發現習慣著鞋生活嘅小朋友傷患數字遠遠高過赤腳生活。

咁上面嘅結構改變點解有助於長跑呢?先講腳掌長度,長度可以有更多容納肌肉,肌腱等等,再加上足弓較高,對於吸收著地時衝擊力更有效率,當吸收衝擊力變好時,跑步經濟性相應亦會提高,原因在於身體減少咗能量用於著地緩衝,喺少數怕長計嘅情況下或多或少有助於長跑運動,所以肯亞人赤腳嘅生活習慣,令佢哋吸收衝擊力更好,提高跑步經濟性同時避免咗高重複性導致嘅運動創傷。

 

參考資料:

Foot Structure and Function in Habitually Barefoot and Shod Adolescents in Kenya(HerjeAibast;PaulOkutoyi; Timothy Sigei;WalterAdero;Danny Chemjor;NefordOngaro;Noriyuki Fuku, PhD;Kenn Konstabel; Carol Clark; Daniel E. Lieberman, PhD; and Yannis Pitsiladis,MMedSci,)

Ask Well: Does Foot Size Affect Running?(BY GRETCHEN REYNOLDS)

Gray’s Anatomy  2nd Edition, Kindle Edition

Comments
Loading...