【露露瘋旅 Lulu Safari】抗疫跑的掙扎

路線……係自己跑出嚟既

運動場關了開完又再關，雖然少咗一個訓練場地，其實也是一個好機會讓我們發掘自己社區更多跑步路線，我居住荃灣區，平時練跑，都只會去城門谷運動場，最近城門谷運動場關閉，便發掘了不同的跑步路線，有斜路有平路有山又有水，例如圍繞城門谷運動場的城門道呀城門谷公園，都可以演化不同路線；要衝interval, 又可以上引水道，自己帶支粉筆度路距離，誰說練interval只能在運動場呢！

沒戴口罩街跑 必須提高警覺

要跑街的話，因為我們沒戴口罩又好似隻牛咁响條街向人迎面衝過去，行人又真係會驚驚，如果經過人多地方，最好戴住口罩jog吓先，到較少人的地方才除下用密實袋袋住 (便唔會濕)；如遇到行人，自己便跑開少少，以免別人覺得我們好annoying 和怕怕； 不過我們自己也要留意這些拉低口罩，邊行邊食煙的死煙鏟，因為他們係咁噴煙，如果他們是帶菌者而我們跑時無戴口罩便會很危險。

上山的話，行山人士都會互相打招呼，現在不妨把開口打招呼改為點點頭，減少一個近距離開口談話的機會。 

唔好亂吐口水

跑得辛苦特別多口水，處長有次跑完 interval 後，可能辛苦到流哂口水，老實講平時真係忍唔住慣咗就咁吐，不過現在非常時期，就最好唔好喇！又或真係袋番啲紙巾，跑後又可以順便抺乾面上汗水再戴口罩。