【One Small Step】去到邊跑到邊:越南篇

0

聽到越南,大家會諗起乜野?「北漏洞拉」?

偽文青蝦叔的答案是:梁家輝套陳年電影《情人》。

除左河粉同咖啡之外,越南只係令我諗起落後污糟。但原來近年,已多左人選擇去越南渡假,例如峴港更加成為新興熱門旅遊地。機緣巧合,今次跟一個在當地工作的朋友到越南旅遊幾天,主要去胡志明市,同埋一個比較冷門地區:頭頓。

事前已經問過朋友「有冇地方跑下?」,越南好多車,特別係電單車,仲會四方八面衝過來,有時候更會走上行人路;加上治安問題,不太適合通街跑。

不過越南也有馬拉松,比較出名的賽事包括峴港、下龍灣,當然亦唔少得今年開始復辦全馬的胡志明市馬拉松。

至於平時,當地人也會跑下街。我就去咗酒店附近,係胡志明市市政府對出的一個廣場跑步。圍住廣場跑一圈大概也有1.6公里,廣場比較空曠,亦見到有人跑步、散步、做運動。周邊都只有街景,沒有什麼特別風景可以欣賞。如果唔想在健身房跑,呢個也是另一選擇。好處係附近有好多cafe,跑完可以嘆咖啡同早餐,七、八點就開門。

順帶一提,除咗靚靚嘅地舖cafe外,仲有好多特色cafe在樓上舖。不過棟樓嘅外表有點嚇人,睇下你夠唔夠膽上去。

另外也去咗「第七區」嘅公園跑,「第七區」是當地商業區,有好多寫字樓同商場,特別日資百貨。周圍環境一流,沿著湖邊跑好舒適,不過就避免中午去,因為好空曠好曬下;跑完仲可到附近食下野、嘆咖啡。

頭頓,一個比較陌生嘅渡假區,離胡志明市中心大約1.5小時車程。酒店對出有一個無敵大沙灘,看日出一流!

(位於頭頓的渡假區 Imperial Hotel &!Beach Club)

 

當地景點包括耶穌山,要行811級樓梯先去到頂。記得用防蚊噴霧,上到去超多蚊。

越南遊小貼士:

因為今次有熟人帶路,好多事變得簡單好多,可以同大家分享一下:

  • 簽證:好多人一聽到話去越南,第一句通常話簽證好貴,要港幣六百多元,又要去領事館搞。今次我就上網搞,填好資料,俾美金8蚊,約兩個工作天就批。之後就列印政府的批函同一張form,帶一張證件照,到越南入境時交,再俾美金25元。全部費用大約港幣二百多元,又唔需要去領事館搞,壞處就係要係機場等二十分鐘。

  • 電話咭:在入境處附近有電話咭賣,我用的是mobi phone,大約美金9-10元,4G無限上網,接收好好。等緊簽證時可以去買!

  • 兌換:帶美金去當地兌換會抵D,攞完行李,在機場出口有幾間找換店,可以格下價𠻹!
  • 貨幣:係越南洗錢,下下幾十萬上落,如果方便計算,可以揚走最尾三個零,大約再除3,就係港紙價錢。

  • 手信:可以買咖啡、茶葉、薑糖等,我亦入咗好多即食粉,平時我好少食公仔麵或即食麵,但呢隻夠低卡,不妨放幾包係屋企,以備不時之需。(不過就快係香港也可以訂購到,有興趣可以看看:https://www.facebook.com/Vietcom-298439157298881/

 

Comments
Loading...