【One Small Step】我的跑步穿搭分享(上)

0

一直都好想寫一篇關於女生跑步穿搭嘅分享文,但又好怕連到廣告、sponsor等問題。最後還是決定去分享,大家自己看同分析吧。

對我來說,著得靚去運動係一個推動力,而另一方面,為左fit D、著多D靚衫而亦係「勤力」的一大原因。「工欲善其事、必先利其器」嘛,永遠都有藉口買衫。

記得多年前跑步,我只是著普通的tee同做gym嘅七分運動褲,跑嘅時候總覺得不自在,出完汗成身好重咁。坦白講,自己都唔想望自己,越怕顯肥,就越是遮遮掩掩。後來減返少少,再加上留意其他人的穿搭,同多看有關書籍,先至好返好多。

1) 色調/風格

衣櫥裡面都有不同顔色的跑衫同跑褲,每次出去跑都會考慮當日心情:

  • 黑白:想簡單,想懶型;如果白色,記得考慮去邊度跑,會唔會做體能,同自己生理周期,費事整污糟,另外仲要檢查有冇走光先出門。
  • 螢光:想表現正面積極。我通常只會上身或者下身sharp,而帽就唔會同上身顏色撞。例如上身shocking pink,帽同褲會低調D。
  • 粉色/甜美:應該是心花怒放的一天,又或者為了同自己打氣。上身粉色咁下身就要換D較柔和色調嘅跑褲、裙,著黑色感覺突兀。
  • 花花的:本身我自己唔太多呢種,就算有可能都係較深色的。一樣啦,千其唔好上身下身都花。

2)上衣

  • 質地方面,我會分兩種:吸濕排汗(dri-fit) 同棉質的。大部分時間,例如上跑班、長課我都會著吸濕排汗的,較輕身,容易排汗。但缺點可能較為貼身,會凸肚(純粹自己經驗)。但點解我仲會買棉質?最主要因為個款靚,你見到好多「影后」嘅相,上衣cutting特別,幾乎件件都係棉質。我只會著來慢跑、fun run,戴腰包也要小心會磨出毛粒,通常我會戴係衫內去避免。
  • 剪裁方面:我自己喜歡背心,肩帶較闊會好D,因為幼肩帶跑起上來件衫會走位,不美觀也容易走光。我不太喜歡Tee,熱之餘,望落也比較肥(當然這也出於我自己身型問題)
  • 大部分上身衫我都會試過同考慮幾點,會唔會太貼身、會唔會容易走位、出汗後會唔會好透、肚腩位、同長度。千其唔好以為買長D遮肚、pat pat,反而看上來更肥、腳更短。

3)  內衣:一定係「運動內衣」,仲要高承托的。跑步算係高強度,內衣一定要買好的,最重要係質地好、承托力夠,可以避免弄傷肌膚同減低不適。之前見過有網友討尺寸問題,可能好多大品牌尺寸有限,太肥太瘦未必啱,其實可以去售內衣嘅店,我試過有不同size,但款色當然冇運動品牌嗰D咁靚。也可以去外國品牌online shop找找,通常有大D尺碼選擇。

講住咁多先!下期再討論下身同我平時係邊度買衫😙

Comments
Loading...