【One Small Step】我的馬拉松喜怒哀樂

0

仲有幾個月又到跑季了,大家已經開始報/報左好多賽事。由2016年初嘅初馬,至今已經跑左八隻了。不算多,但想趁下季開始時總結一下,當係給自己的回顧。如果令大家報名時可以參考,咁就更加係bonus了。

喜:京都、武漢

我好幸運,京都初馬並不痛苦,反而十分enjoy! 京都馬在二月舉行,天氣冷跑馬最舒服。限時六個小時,cut咗上線時間即係約五個半鐘多D,的確令初哥有點擔心。但賽道設計很有心思,途經多個世界文化遺產,例如仁和寺,也可以眺望嵐山、度月橋的風光,彷如去咗個day trip。日本馬氣氛好不用多提,而且大會安排各種傳統藝術表演,目的令參賽者更加認識京都。

啱啱四月頭的武漢馬是一個驚喜,返大陸跑馬係好多人眼中的「作賤自己」,去過幾次,只能說自己好彩冇事。未去之前,我以為武漢叫「火爐」一定好熱,成個鄕下咁。但去到先知,賽事整體安排十分周到,路線規劃亦有心思,橫渡長江、途經黃鶴樓、環湖跑,見盡武漢美景。氣氛,仲要非常好。當然,在大陸普通話、簡體字一定少不了,係咪接受到就好睇個人,我自己就唔會因為呢啲而否定晒一切其他優點。

怒:新加坡Sundown

點解要俾嬲嬲豬呢隻馬呢?新加坡天氣熱、半夜起步要捱眼訓,通通都在預期之內。作為一個發達城市,賽事安排就令人十分失望。攞號碼布要排兩三個小時、分區起步混亂同延誤,零氣氛,仲有好多人都以散步形式參與,賽道大部分在漆黑公園內不停「輪迴」,感覺好像走進不歸路。

哀:清遠、台中新社

不要誤會,我冇食番梘亦沒有什麼意外。2016清遠馬賽事安排好正常、補給亦充裕,賽道算係全平坦就較悶,冇乜氣氛。用「哀」來形容主要當日天氣潮濕,蝦叔因為陪我呢位慢腳跑,搞到佢最後幾K撞牆。呢次係我第一次遇到,唔知點樣幫佢,只能邊行邊影為佢加油。

今年二月的台中新社櫻花馬拉松,聽到個名好似好浪漫,但對於我咁怕斜路來說是痛苦的。未到三點已經要出門口,加上當日唔好彩下大雨,未起步已經好攰。沿途風景優美,亦有花欣賞,可惜的是頭半馬係大上大落,上斜只好做步兵。第一次跑完半程感覺已經好像虛脫一樣。

樂:田中、廣州

田中馬啱啱出左抽籤結果,每年都要爭崩頭。又熱又算是較鄉下地方,點解仍然咁受歡迎?好奇心影響,上年就參加一下,睇下有乜嘢咁好。結果發現,當地人好客熱情,由比賽之前的一天已經有大型嘉年華同巡遊,除左運動用品、宣傳攤位外,仲有好多農產品賣,好似當地的米、麵。比賽當日天氣太晴朗了,過程算是辛苦,但幸好有居民支持,大量補給同表演,增添許多樂趣。幸運地我在呢隻馬成績比想像中好,算係意外收穫。

又係大陸呀,冇計貪佢平同貪佢近近地唔駛攞假。個位都係報團先有。點解咁受歡迎?呢隻馬優點除左地點方便、賽路差不多全平外,也因為氣氛好。但坦白講,廣州馬的氣氛仲未及得上京都、田中同武漢。

以上純粹個人意見,之前每次比賽我都有寫報告,但今次將佢合成一篇,希望順道方便到各位。咦?好似仲差一隻,就係渣馬!相信好多人也參加過,啱啱過去一屆係我第一次參加,亦PB了。嚟緊呢季希望破咗佢!大家也加油! Keep going and Enjoy!

Comments
Loading...