【One Small Step】由原宿走進舊街角

0

每次去東京,原宿是我必去嘅「景點」;記得兩年多前蝦叔第一次遊日,我仲笑佢連原宿竹下通都唔識(當然,佢每次都以我唔識神保町來反擊)。

去咗咁多次東京,旅跑卻是第一次。由於今次只是路過東京,加上我兩星期雙連馬(網走+松本),不能讓自己太疲累,所以只去了兩個慢跑熱點留個紀念:就係皇居外苑和代代木公園。

另外,松本馬拉松後,我梗係唔放過機會都搵地方做做recovery。今次呢篇,就介紹下我今次三次小跑的經過。

一、皇居外苑
我地就搭Metro於二重橋站下車,行兩三分鐘就到皇居。有指示要跑友逆時針方向跑,地面上有不同圖案設計顯示距離,一圈大概5公里。沿途都有店鋪提供locker同沐浴設施(不過最好事前上網查詢一下收費,有些可能只限會員)。我就上咗一間叫Run Pit嘅店 (http://runpit.jp/sp/),係大約2公里位置,過馬路一個商場1/F,十分整㓗,仲有少量衫賣。跑完當然食早餐啦!皇居離東京站大約1公里,因為個車站好大,有好多食品選擇,仲可以買手信。我就去咗好出名生果蛋糕嘅千疋屋cafe食早餐,只係估唔到閒日都要排😩。

另外在網上看到另外兩個跑者站,可供參考:
Raffine (在日比谷站A5出口)
Adidas RUNBASE (永田町站4號出口)

二、代代木公園
位於Metro明治神宮前站附近,如果住新宿,去呢度跑好方便;另外也可以搭JR去到原宿站跑過去(約1公里)。公園唔算好大,一圏好似只有兩三公里,不過好多樹,好啱怕太陽嘅我。

三、淺間溫泉
下一站松本:由東京坐4小時巴士,一個比較樸素的地方,只知道有溫泉、松本城,同埋草間彌生。松本馬拉松翌日,習慣早起的我就去旅館附近晨運,做個恢復跑。沒有特定路線,只係隨心在附近跑下,欣賞風景。跑完仲可以嘆溫泉同早餐!

呢兩次旅程唔只係飲飲食食、shopping咁,而係有好多體會同得著,也為自己找一個空間去思考、認識自己。

 

 

Comments
Loading...