【One Small Step】留一片獨遊回憶,在北海道

0

點解會有呢個「毒」遊? 因為好耐冇試過放長假,於是玩盡佢,匆匆報咗網走馬拉松,臨時訂酒店機票,搞咗一輪先安排好行程。

今次五天遊,主要停留札幌同網走。到了札幌後,選擇搭JR去網走。一日得好少班次,所以一到札幌JR就買了來回票,大約17,000 yen,車程約5個半小時。另一途徑係搭內陸機,大約三小時,不過我之前怕搭飛機麻煩,又要去機場,所以選擇坐JR (06:56開)。

荒蕪但友善的城市 — 網走

到達網走就去醫肚,係Tripadvisor找到同車站距1公里的迴轉壽司。當日係星期六下午1點,成條街冇乜人,天氣好好,秋風送爽,感覺好舒服。

因為臨時決定去,所以只能訂到一間離JR網走站約13公里嘅溫泉旅館。下午攞完號碼布就返酒店休息了(我唔識揸車,最後搭的士,另一選擇係巴士,不過成個小時一班)。旅館遠就遠D,但對出係一片紅色的草群,見到放低行李就即刻落去跑!

 

除咗係草群附近跑下,仲可以去行人路、沿單車路跑,周圍探索一下。不過要注意日落前返回旅館,始終偏僻,入黑危險。

上圖飯糰,其實係旅館知道我要跑馬拉松,趕唔切食早餐特意為我整的。深知道,呢啲已經唔係服務,而係人情。食落肚的,已經不只是能量,還有暖意。由於找車不易,旅館還特地開車載我到起點。這些待遇,令那天網走清寒的早上注滿熱能。

能取の荘 かがり屋(Kagariya),這家能取湖畔的旅館,我會好好記住。

重回浮華大地

比賽之後(比賽詳情見另文:https://goo.gl/usjNv3)就返回札幌,有時間當然找找路線去跑下。係日本,真係好容易就找到跑步地方,在我住的酒店附近約800米已經是大通公園。咁啱9月舉行 Sapporo Autumn Food Festival,公園兩旁全部都係賣野食、賣酒嘅攤位。

另外大約4公里外就係円山公園同動物園,所以最後一朝早就來個恢復跑,由大通公園走到円山公園來回。清早天氣好涼,大約13度,空氣好好。早上七時多已經見到有人在公園跑步又或者跳舞晨運。由大通公園去円山公園都係一條直路,要留意就係沿途好多馬路,記得睇交通燈。

 

愛上獨遊

記得對上一次去北海道已經是七年前,跟鴨仔團,走馬看花,對這片國境之北並無太深印象。今次出發前,既有女子獨遊失蹤消息,又有北韓飛彈危機。雖然知道,呢啲同自己今次旅程安全與否99%無關,但點都會令自己多野諗左。

不過我又覺得,做人間中要有少少冒險先有意思。今次旅程,沒有常伴左右那個人的笑鬧,只獨個兒聽鄂霍次克海風在耳畔吹過,看頭頂一片蔚藍得令人妒忌的天空。遠方的緩慢安寧,配襯少許孤獨,生活原來還有很多不同面相。

 

Comments
Loading...