【One Small Step】跑山令我畏懼 (蝦嫂篇)

0

跑步令人謙卑,跑山卻令我怕怕。

多謝生動歷香港中心 (Lifexplore HK Centre)邀請做 「Running HK 2017」活動大使,我先有動力再次走上山。

叫得做「Running」又有mini games玩,結果我就叫埋班朋友一齊去郊遊下。大家都知我怕行山,山賽都係第二次,對上嗰次圖騰後,事隔6個月先再親親大自然。

沒有太多裝備、沒有試路,就開始了。事前大約知道有部份山路:大枕蓋》西灣亭》上窰郊遊徑》北潭涌。開頭係石屎路,但已經係上斜,咁岩當日自己狀態好一般,淨係上斜已經令我好辛苦。

落返斜之後,就開始不見盡頭的山路。起初都冇諗住咁嚴重,但真係唔可以睇小落雨既威力。成個上山既路都佈滿泥漿,上斜變得難上加難,根本一步都跑唔到。有時候發呆一陣,又跌一交😭

我不期然就埋怨蝦叔,做咩叫我玩埋晒呢啲咁難度高既比賽。邊個話有靚景!邊個話「欺山莫欺水」!我覺得游水易得多囉!呢個時候,我就聽到其他參賽者一D對話,好似「跌低咗咪起番身囉」「專心D,好快到」「多謝你陪我玩」等等好正面嘅對話。其實今次比賽背後意義,係提醒大家人生好似山賽咁有高低起跌,互相扶持就可以跨過障礙。

頓時變得積極同專心,亦想到之前看書的一些技巧,例如步距要細先可以靈活、搵D石頭丶草做踏腳面、跳下跳下咁、有時候要用手等。冇太多行山經驗,只能靠記得的少少技巧。

仲有呀,一路跑一路想到朋友之前的話

  • S Sir 話跑得多就好、要專心、同帶D甜野獎下自己 (所以我有帶朱古力!)
  • 朋友A 就成日話跑山D衫同鞋好靚,我同自己講一定一定要買過對鞋,因為真係跣到死!
  • 朋友J就話山不同路跑,唔好望pacing,要留力。其實試路都好緊要,起碼知道怎樣分配時間同體力。
  • 好多跑友就話跑山會上癮,我仲未感覺到,不過D相真係好靚啊⋯⋯

睇番條路線,原來大枕蓋係西貢其中一條受歡迎的行山路徑,可遠眺萬宜水庫,而係春天仲有好多吊鐘花。

我一直覺得對山野應存敬畏之心,但究竟我幾時先會多親近佢呢?看看緣份吧❤️

Comments
Loading...