【One Small Step】連馬滋味—下一站,松本

0

於蝦叔周報也會分享松本馬拉松,關於資料方面留番俾佢喇,我就分享一下自己感受。

我不嬲都好錫身,也從來沒有想過跑連馬。今年三月時已經和朋友一起報了松本馬,反而網走馬拉松係前兩個月先決定去。坦白講,心情有點複雜,難得有假就可以玩多D,但又怕自己應付不來,所以沒有特別向朋友提過。

當日早上6:30已經和朋友到達會場攞號碼布準備開始。比賽限時5個半小時,緊張當然有(仲不停去洗手間),幸好跑完網走馬後腳沒有什麼問題,也有充足睡眠,應該可以完走。

比賽於8:30開始,好熱鬧也有好多人打氣。同以往一樣,我手錶錶面只會顯示心率,唔想因為速度而忘記心率。一開始跑感覺好輕鬆,心跳亦只在zone2,跑了幾公里後蝦叔就話「跑得好好,keep住啦」。第五公里已經走過松本城,氣氛相當好,心情興奮,就算天氣開始熱起來也可以繼續,心裏就開始想「可以試下PB半馬喎」。於是繼續專心跑,上斜也keep住跑,去到15公里位開始感到乏力,食下gel、電解丸,勉強地做到最佳半馬時間。

但同時開始憂慮自己能力,每公里pacing開始跌了差不多二十秒,「係咪已經撞牆?」「仲有21K點行返去?」「點解我咁不自量力?」沿途開始多人停低休息,好多也是時間較快的B、C組,搞到我都想做步兵。相比起網走馬拉松賽道,松本馬拉松的起伏相對少D。但後段跑起來卻較吃力,主要因為地方空曠,要在烈日下跑 (平均氣溫20度,最高31度),加上逆風,心跳一度維持高水平。

有見過這樣狼狽的我?成口gel!

 

 

高度圖:(上)網走馬拉松;(下)松本馬拉松

 

由於大部分嘅路段都是民居或者田野,打氣的民眾變得少了,加上好疲累,只有專心繼續跑,跑得幾多得幾多。去到三十多公里,見到迎面的跑友,大家都大汗淋漓,聽到佢講加油,我也無力回應。33公里位,我把最後一包gel也吃掉了,但身體卻一樣無力,好似有點浮,仲好大風,我不斷搵人擋風但也沒有幫助。

去到最後五公里位,忍不住問蝦叔「仲有冇gel? 我唔係好得……」佢話:「冇呀,飲sports drink啦!」我開始腳軟,忍不住趁飲水時停一下。但好快又再同自己講「頂埋佢」「頭二、三十公里跑得好,而家放棄好唔抵」。

就因為咁,眼見蝦叔越走越快,我也跟上,亦冇同佢講不如放棄。另一個支持係想到教練,佢平時會俾信心我去跑,又成日叫我食多D野,都係為我好。每次跑到好辛苦、想停,就會想到佢嘅訊息同指示,然後再頂硬上。

走下走下,每一個水站去一去,就走進運動場最後二百米了,望住個鐘,扣番等候起步時間,PB了!之後已經攰到行唔到。

已經第十次了,每次都係擔心,害怕失敗,但下次又會繼續報!馬拉松之美除了賽道上風景,亦因為一段路程可以有期待、開心、沮喪等不同的深刻體驗。試試給自己一場冒險,體驗內心交戰的世界。

又再貼多次松本馬精華片段,俾你睇到氣氛、賽道情況:

為咗呢1分鐘,整咗成個幾鐘今次有得留念了真係冇呃你,跑到黑面、寒背冇貨啦😅😅😅#松本マラソン#matsumotomarathon#memory

Posted by 蝦嫂 Stephanie on 2017年10月2日

 

 

Comments
Loading...