【One Small Step】除了跑,我還會做這些運動

0

天天跑難免枯燥,交叉訓練可以為訓練帶來一點不同,也會令身體領略到「新鮮感」,避免長期只操勞同一組身體部位。以下這些,是我在跑步之餘會做的運動。

 

1) 泰拳課

每周的地獄星期一,課堂約一小時,好多人會好奇會做D乜,因為每次都只會影做「平板」動作。其實每次都唔同,通常分為兩part:頭半堂會多舉重,或者有時候係HIIT。因為平時成日跑,我地有時會要求多針對上半身。記得初期開始跑步,越跑越肥同鬆泡泡,後來找教練操肌就好返少少。課堂以外,亦會交流下其他知識,例如飲食。畢竟要fit,單靠每星期一課不足夠,平日也要自律,我地平日衝完interval、easy run之後也會做下幾組push up、sit up。

2)游水

以前會覺得去游水好悶好麻煩,唔太喜歡。反而開始跑步就感覺到佢嘅好處。游泳可以令肌肉放鬆,特別是小腿,但同時亦可以練氣、練上身肌肉,令到整個人平均啲。有時候我只會踢腳,令大丶小腿得以放鬆;有時候就只用手,練下手臂、膊頭等肌肉。另外有朋友也介紹過游水interval (衝200米休1分),加上跑游跑等轉項練習,游水也可以好好玩。

3)地獄單車

我唔係好知點叫佢,好多人會以為室內單車好hea,但呢隻spinning一啲都唔係,仲勁爆汗同燒脂。根據導師指示而調較阻力,配合不同姿勢,模擬上落斜,隨著拍子踩,減肥之餘仲可以練心肺、鍛練大腿肌肉。差不多7、8年前我接觸到呢項運動,短短三個月已經收左身。之後開始跑步都較容易pick up,無論心肺同大腿肌力都預備好了。停了單車差不多兩年,近來有機會參加番,希望藉著每周嘅一丶兩節課堂,加強心肺同大腿肌肉鍛練,減少受傷機會。

4)瑜珈

一直我都不喜歡瑜咖,怕悶又覺得對減肥冇乜用。但感覺自己整個身體越來越硬,開始有點擔心受傷。想冇咁悶又想靚,所以最後選擇了空中瑜珈。一節課堂大約一小時,頭半節通常站在地上做不同拉伸平衡動作。相比普通的瑜珈,多左塊布伸展好似仲容易左、拉多左,特別係後大腿、內側等。後半課會有較高難度動作,很多時候要用到手臂、腹部core嘅力去帶動同平衡,亦有倒吊等動作。雖然有點困難,卻是很有滿足感。

寫到呢度,再一次覺得其實跑步好有哲學——想一件事情好,就不能每天24小時都要圍繞住佢。反而,偶然做做其他事情,由它暫時放在一邊,到頭來效果會更加好。
跑步正是如此,間中加插交叉訓練,讓跑步「放一下假」,反而能促進整體訓練。希望大家都找到自己的第二、三、四……最愛啦!
Comments
Loading...