【One Small Step】2018柏林馬拉松後記 – 最後一次?

0

現在係9月18日,坐在德累斯頓嘅一間露天cafe,聽著50米外頗悅耳的街頭賣唱,開始回想48小時前柏林馬拉松的畫面。

曾經蝦叔同我講過「有朝一日你都可以sub-4」,我只是回應「順其自然啦,唔係話做就做,跑到先得㗎」。自知自己不是跑步的材料,一次比一次快已經滿足了。

(上圖:柏林馬expo,戴上手帶就感覺更緊張)

想不到兩個月前突然離sub-4這件事近了,當教練、朋友開始說你有機會,壓力亦隨之而來。雖然10公里走進50分,但始終半馬從未正式走入2小時,覺得大家也高估了我。所以一直也沒有公開說自己有什麼目標。

(上圖:事前唔敢俾人知的bib 號碼)

終於來到「決勝日」,一早就起來「FEEDING」(指吃早餐,因只求夠飽而唔係享受美食)之後就戰戰兢兢去會場。天氣好,只是少少熱,天時地利俱備,餘下只欠自己。

(上圖:賽前幾天的加碳日,真係食到儍)

我在最後一區H區(4小時15分或以後)起步,等了差不多一小時先出發,氣氛相當熱鬧,亦有各式各樣的打扮、熱身活動緩和了我嘅緊張。最後我們一區宣告開始,我向蝦叔和友人互道加油就各奔前程了。

柏林馬拉松

一開始比想像中擠迫,好多人肉路障,心想一定要突圍而出,否則之後好難追,於是左閃右攝,好不容易先1公里 – 5分26,比預定的慢,但心跳已經上到158,狀態指數亦是「0」。心情沉咗一沉,冇得諗太多,保持呼吸、專注、前進。 5:14、5:07、5:20…… 手錶嘅一公里提示已經有點亂 (可能我兜路避人)。突然有人從後故意推我一下,嚇一嚇,好彩沒有跌倒。有幸運之神眷顧,之後更要把握機會,沿途定時飲水、食gel,萬事小心,整個地面也是膠杯,好像交響樂一樣,每次到水站我都想盡快離開。好不容易才到10公里,53分鐘多,同計劃的一樣。但心跳狀態就不在預期之內,不禁令我隱隱然擔心起來。

柏林馬拉松

(上圖:進入會場前會見到終點,當然影咗先啦!)

開始第二個10公里了,繼續維持同一速度,繼續攝上去,心跳當然再上。附近已經開始有影相的、玩電話的、步行的…… 突然有人叫我,原來是蝦叔,一句ok之後又各自努力。在15公里處,另一跑友一句「蝦嫂加油」,原諒我目光呆滯,因為反應唔切,加上橫隔膜抽住痛(多謝你呀)。

(上圖:賽道會有三間線標示)

半程時間大約1小時53分鐘,半馬PB了,沒有太大興奮,因為真正嘅挑戰是下半程。記得教練提過餘下的就靠意志和平日訓練完成,立即重新調整跑姿和呼吸,同自己講「我這狀態可能只有一次,盡做啦」、「笑下啦,其實唔太辛苦」。途中不斷想到夏天30公里長課,中午時的運動場,其實比起而家更辛苦。在廿幾公里位依然努力在人群中穿插,更要顧及膠杯陣和橫越賽道嘅行人(有單車、也有推bb車的),專心嘅時間過得特別快。

(上圖:全程心跳頗高,狀況亦不似預期)

30公里大約2小時41分鐘,剩下12公里,6分披也應該可以4小時內。本來想享受餘下的公里,但想到教練和朋友支持(他們正在live track),不如跑得漂漂亮亮,盡力走出最佳時間。繼續專注、保持笑容、跨過膠杯陣,更要超越4小時15分配速人肉路障。

柏林馬拉松

(上圖:最後的幾公里,人群中找到我嗎?)

想加速但已開始感到疲累,一幕幕深水埗練跑的情景出現了,包括推快我2K tempo和帶快我800的同學們,更有教練嘅聲音「攰嘅時用上半身,記得擺手呀!」,真的感謝那些練習,令到我可以堅持到最後關頭。平安過渡最困難的31-37公里,最後一包gel都吃了,離終點越來越近,心情振奮起來。 最後5公里就出盡力衝回終點,超額完成了。第一時間開電話,教練打來,我已經喊到收唔到聲。

柏林馬拉松嘅賽道被視為「最速賽道」,可圈可點,賽道平坦是真的,但「最速」可能只限於頭幾組,在最後一組要力爭上游是十分困難,去到三十多公里仍有塞人情況,路線好多灣位,又會突然收窄,而水站、花灑位更是高危位置。

(上圖:賽道有好幾個彎位,如果想跑準就要靠右,但另一問題就是塞人)

能夠跑到理想成績固然開心,但呢幾個月嘅轉變亦令我想到要珍惜機會,狀態唔會永遠在高位/低位,所以更加要抱著「得意時淡然,失意時坦然」嘅態度去面對。

這個成績、我的故事對很多人來說可能只是普普通通,但希望可以鼓勵到由零開始的跑友。從來都覺得跑入4小時內係一個妄想,用跑interval配速跑全馬喎……今天我完成了。

在此亦要感謝關心我的朋友,無盡的私訊鼓勵、事前建議、賽事直擊……我真的很幸運!

 

延伸閱讀:

【One Small Step】我這樣面對跑步樽頸

 

Comments
Loading...