【runrun專訪】再次披上整套「踢死兔」,用最真摯笑容送上完賽TIFFANY ,佢叫Dennis (呂偉強)

0

▲精華片段

今個星期日係名古屋女子馬拉松起跑日子,Dennis(呂偉強)去年成功入選賽事禮服男而一舉成名,今年佢再一次申請,同樣地順利再次加入依個50人團隊,喺終點恭候每位完成比賽嘅參加者,出發之前我哋RunRun特別邀請Dennis做一個專訪,了解作為禮服男各種心路歷程之外,亦都提供一啲建議俾有志成為禮服男嘅男士。

再次報名源起於一份友情

「今年我地都參加,你嚟唔嚟呀?」一句上年隊友嘅問題,Dennis再次提起興趣,不過今次報名並唔係因為食過番尋味,更加唔係為名為利,而係出於友情。

與Dennis言談間有提及過,申請成為禮服男只有車馬費及一套度身訂做嘅「踢死兔」外,其餘都要自費承擔,就連當日活動後嘅慶功宴其實都只係禮服男自發圍內舉辦,主辦單位係馬拉松完成之後,基本上一切安排都會告一段落,所以參加者大致上都以做義工心態報名及參與。

雖然言語不通,但無阻友誼的建立。 (圖: 賽事官網)

 

當中最為Dennis所動容嘅就係一班禮服男彼此間嘅友誼,活動過程中Dennis坦言人生路不熱,日文都半桶水,報名文件要拜訪朋友幫忙先可以順利完成,臨出發之前都自覺未準備好,不過活動當日有幸得到其他禮服男幫助,大家互相照應,亦因為Dennis係一個香港人嘅身份,其他禮服男會主動了解佢,數日間大家嘅友誼就此萌生,活動後一直有保持聯絡。

 

新鮮感不再,責任更重

Dennis憶述每一次參加時新鮮感相當重,所有嘢對於佢嚟講都係一個全新領域,不過今次參加感覺一切都不再陌生,對於流程安排,所面對的情況,甚至小隊陣中成員都已經略知一二,隨之而來嘅反而係一種責任感.作為再次獲選為禮服男其中一員,小不免會被冠上前輩名銜,而今年有更多外國人成為禮服男,感覺自己有必要照顧第一次參加的新人,就如去年大家對佢嘅照顧一樣,所以覺得今年感覺會不再一樣,新鮮感減輕同時責任感更重。

百貨應百客

記者有觀察到一點,就係50人大隊中不單只國藉多元化,連年齡層片佈亦非常之廣,年輕至二十多歲,壯年至五十歲成熱型男都有,而且各有自己特色,部份更與一般世俗對美男子的睇法有所不同。

今年部份禮服男的名單 (圖: 賽事官網)

 

對於記者嘅提問,Dennis半帶講笑說出一句「百貨應百客。」,確實,名古屋女子馬拉松雖然是運動盛事,不過依然係不折不扣嘅商業,站在行銷角度諗禮服男範圍愈廣,吸引到女士報名參賽嘅可能性就會變高,所以百貨應百客絕非衝口而出嘅笑話,同時亦引申出另一個問題,到底要成為其中一員有咩標準呢?

兩個必殺技,助你順利入選

Dennis提到“靚仔、後生、講得一口流利日文”並唔重要,根據佢自身嘅經驗認為笑容同一張型仔相勝過上述所有條件,每年選委口味都會有所不同,可能出於商業原因,亦可能選委成員不同,做成評審標準沒有或一標準,即使上年成功入選,今年再報名亦沒有任何優勢,所以想係云云參加者中脫穎而出,Dennis覺得一張型仔相配上一副真摰笑容就足夠。

 

Comments
Loading...