【Sumsum的跑步一二事】滿是驚喜的逆の女

0

第一屆逆の女在剛剛過去的週末完滿結束,一個如此精彩又特別的賽事,我不得不與大家分享。

大會宗旨:鼓勵女生「放下手袋,孭起背包; 抹去化妝,塗上防曬;脫去高跟鞋,換上運動鞋。」於是由宣傳到比賽都落足心機,無論你是有經驗的跑者還是新手,一樣可以參加,一樣可以享受至公主式的對待,絕不誇張!

心花怒放紀念品

好多人報比賽之前都會睇吓紀念品吸唔吸引,逆の女要吸引女生,紀念品更加不能馬虎。

雖然我報名不是因爲紀念品,但其實身邊有好多朋友都是因爲紀念品而報名,到底幾吸引?自己睇啦!

(選手包及特別禮品包)

 

花全部都係花,坦白講有邊個女仔唔鍾意花先?選手包入面有花花背心風褸一件同行李牌一個,同平時比賽送的明顯不同,我自己就最喜歡個行李牌,而家日日掛住係袋。

(加購的紀念品)

加購的紀念品更加瘋狂,「嘩係花花呀!」、「嘩桃紅色嘅太陽眼鏡呀!」,有花花Sports Bra、跑褲同頭巾,最瘋狂是那副太陽眼鏡,秒速售罄。

你以為只係咁?咁就錯啦!因為驚喜係一浪接一浪,無啦啦仲話去拎選手包時可以額外獲贈禮品包一份,入面有面膜、防曬、爽膚水等,問你死未!

(特別禮品包)

 

CP的暖男

唔係講笑,大大話話都玩過幾個大型山賽,逆の女CP嘅男人肯定係最暖嘅!

(CP1 HNR跑步團隊)

 

CP1由HNR跑步團隊主理,未落到土地灣已經聽到佢地把聲,真係醒哂!一班型男加索女不停關心你「夠唔夠水飲呀?」、「要唔要糖呀?」,仲有人搣埋蕉皮,係差在冇餵埋。最正係佢地仲提供free hug,有幾個仲幾靚仔,不過就唔知係益我地定益佢地啦哈哈!

(CP2,3,4)

 

CP2,3,4則由The Peak Hunter、爛頭營同跑匀全世界主理,每次去到都有男士9秒9衝過來問有咩需要,仲有人主動幫我加水同運動飲品,實情係我真係可以「企定定係到,乜都唔使做」。

當然,你可能覺得咁樣好似好港女,但又真係營造到大會想要的氣氛,一年一次,你咪比我地做下公主囉。

其他窩心安排

大會揀了港島徑作賽道,大部分都是石屎路,相對簡單,就算是新手都能夠完成。雖然較西貢及大嶼山的路線悶,但勝在氣氛搭救。

可能大會都怕大家悶,中間的指示牌仲寫上「抵死」的打氣字句,見到真係會心微笑,心入面講句「救命!真係好正!」。

(「抵死」的打氣字句)

 

另一窩心安排就是終點的逆の男,跑完50公里,去到終點有班型男等你返來,同你講恭喜又幫你掛埋完成牌,「係愛呀」。不過聽說今次大會邀請的逆の男都已經已婚,不如考慮吓下年邀請返啲單身靚仔啦!(我幫各位姊妹謀福利咋…..)

(係逆の男呀)

 

(完賽牌)

 

其實窩心安排點止咁少,一個比賽提供埋化妝服務,等你靚住比賽又靚住完賽,我諗真係冇一個比賽試過咁。

(化妝服務)

 

總括來說,逆の女確實是個值得一玩的賽事,整個比賽都感受到大會的用心。倘若你錯過了今次的比賽,唔緊要,因為我相信,下年一定會再有!

 

延伸閱讀:

【Sumsum的跑步一二事】我最喜愛的跑步歌曲

【Sumsum的跑步一二事】原來初馬真的好難忘 – 神户馬

 

 

Comments
Loading...